Eitrað alkóhól dró átján til dauða

Að minnsta kosti átján verkamenn eru látnir eftir að hafa drukkið eitrað alkóhól í Pakistan í gærkvöldi.

Verkamennirnir voru staddir í gleðskap í borginni Faisalabad þegar þeir drukku áfengið. Flestir þeirra sem létust voru látnir áður en þeir komust á spítala.

Yfir tuttugu liggja alvarlega veikir á spítala með áfengiseitrun.  Borgaryfirvöld hafa fyrirskipað rannsókn á atvikinu en svo virðist sem mennirnir hafi allir drukkið alkóhól-vökva sem kom frá sama bruggaranum.

Nú stendur Ramadan, föstumánuður Múslima, yfir og eru allar áfengisverslanir lokaðar.

Þrátt fyrir að Múslimar megi ekki kaupa né innbyrða alkóhól í Pakistan - eru margir sem virða þær reglur að vettugi og kaupa heimatilbúið vín af bruggurum.