Lestarstjórinn með böggum hildar

Lestarstjórinn, sem ók lestinni sem fór út af sporinu við Santiago de Compostella á Spáni á þriðjudag, var leiddur fyrir rannsóknadómara í gær.

Hann heitir Francisco Jose Garzon Amo, er 52 ára gamall og á yfir höfði sér að verða ákærður fyrir að hafa orðið 79 manns að bana og 130 eru slasaðir, þar af margir mjög alvarlega. Hann hefur verið settur í farbann, en er ekki hafður í haldi.

Enn er óljóst hvernig það mátti verða að lesltin var á meira en tvöföldum hámarkshraða þar sem slysið varð, en sjálfvirkur búnaður á meðal annars að bregðast við slíku. Vitni segist hafa heyrt Amo segja að hann hafi ætlað að hægja á lestinni en þá hafi það verið orðið um seinan. Þá hefur Reuters það einnig eftir Evaristo Iglesias, sem er íbúi Santiago de Compostella, að bílstjórinn hafi sagst óska þess að vera dauður.

Fyrir dyrum stendur að halda mikla minningarathöfn í Santiago de Compostella og verða viðstaddir Mariano Rajoy forsætisráðherra, en hann er einmitt frá Santiago, auk meðlima spænsku konungsfjölskyldunnar.