Tók stuttan bíltúr í farangursgeymslu rútu

69 ára gömul kona frá Tromsö lenti í óskemmtilegri lífsreynslu í gær þegar hún læstist inni í farangursgeymslu flugrútunnar milli Osló og Gardemoenflugvallar. 69 ára gömul kona frá Tromsö lenti í óskemmtilegri lífsreynslu í gær þegar hún læstist inni í farangursgeymslu flugrútunnar milli Osló og Gardemoenflugvallar.

Að því er fram kemur á vef Verdens gang hafði konan, við komuna til flugvallarins teygt sig innst inn í farangursgeymsluna til að ná í tösku sína en þá vildi ekki betur til en svo að hlerinn lokaðist á eftir henni og rútan ók af stað.

Hún hringdi strax í lögregluna og sagði frá raunum sínum, og laganna verðir komust í samband við ökumanninn sem nam staðar á bensínstöð nálægt Gardemoen, þar sem konan komst út, en þá hafði ferðalagið staðið í um þrjár mínútur.

Talsmaður rútufyrirtækisins sem um ræðir, Nor-Way, sagði í samtali við VG að um leið mistök hafi verið að ræða, en bílstjórinn hafi verið að tala í síma við yfirboðara sinn þegar hann lokaði geymslunni. Hann hafði reynt án árangurs að komast í samband við konuna óheppnu til að biðja hana afsökunar, en bætti því við að hún fengi fargjaldið að sjálfsögðu endurgreitt.

Ekki er ljóst hvort konan hafi misst af fluginu sem hún hugðist ná.