Segja orð forsetans veita sér styrk

Foreldrar Trayvon Martin, 17 ára drengsins sem skotinn var til bana í febrúar í fyrra, segja ummæli Baracks Obama Bandaríkjaforseta á blaðamannafundi í dag hafa hreyft við sér.

„Við vorum djúpt snortin þegar Obama gaf sér tíma til að tala um son okkar, Trayvon,“ segir í yfirlýsingu frá Sybrina Fulton og Tracy Martin, foreldrum drengsins, en George Zimmerman var sýknaður af ákærum um morð í síðustu viku. Hann segist hafa skotið Martin í sjálfsvörn.

Ummæli forsetans voru á þá leið að Martin hefði getað verið sonur hans, eða hann sjálfur fyrir 35 árum.

„Orð forsetans veita okkur styrk á þessum erfiðu tímum og við erum þakklát fyrir bænir forsetahjónanna,“ segir ennfremur í yfirlýsingunni.