Spennan vex í Egyptalandi

Egyptar búa sig undir þriðja mótmæladaginn í röð. Fjöldi manns dvaldi í tjöldum yfir nóttina í miðborg Kaíró.

Múhamed Morsi forseti hafnar ekki beint úrslitakostum hersins, sem gaf honum í gær tveggja sólarhringa frest til að ná sáttum við andstæðinga sína. Hann segir þó að ákveðin atriði í yfirlýsingu hersins geti skapað óróleika í þeirri flóknu stöðu, sem nú er uppi í landinu.

Herinn sendi seint í gær frá sér viðbótaryfirlýsingu, þar sem hann ítrekar að ekki standi til að gera stjórnarbyltingu: "Hugmyndafræði og menning egypska hersins gerir ekki ráð fyrir því að stefnt sé að herforingjabyltingu."

Í fyrri yfirlýsingu hersins segir hins vegar að hann muni birta eigin "vegakort til framtíðar" og kynna hvernig hann hugsi sér að framkvæma það, takist ekki sátt innan tveggja sólarhringa.

Hundruð þúsunda manna tóku þátt í mótmælum í Kaíró og fleiri borgum Egyptalands í gær. Síðla dags fóru stuðningsmenn Morsis forseta einnig á stjá, og kom sums staðar til átaka.

Viðburðaríkir tímar í Egyptalandi

2011

25. janúar hefjast fjöldamótmæli um land allt gegn Hosni Mubarak, sem hafði verið einráður í landinu í nærri þrjá áratugi.

11. febrúar Mubarak hrökklast frá völdum og felur þau hernum. Tveimur dögum síðar leysir herinn upp þingið að kröfu almennings.

19. mars Stjórnarskrárbreytingar samþykktar með yfirgnæfandi meirihluta í þjóðaratkvæðagreiðslu.

28. nóvember Þingkosningar hefjast, en eru haldnar í áföngum til 15. febrúar 2012. Íslamistar vinna glæstan sigur.



2012

23.-24. maí Fyrri umferð forsetakosninga. Mohammed Morsi og Ahmad Shafiq fá flest atkvæði.

14. júní Stjórnarskrárdómstóll landsins leysir upp neðri deild þingsins. Herinn bregst fljótt við og rýmir þingið.

16.-17. júní Seinni umferð forsetakosninga. Morsi sigrar naumlega en herforingjastjórnin tók sér aukin völd á kostnað forseta með stjórnarskrárbreytingu.

30. júní Morsi tekur formlega við embætti.

12. ágúst Morsi sendir helstu leiðtoga hersins í helgan stein og ógildir síðustu stjórnarskrárbreytingu hersins.

19. nóvember Fulltrúar frjálslyndra flokka segja af sér þingmennsku á stjórnlagaþinginu, sem þjóðþingið hafði stofnað til áður en það var leyst upp.

22. nóvember Morsi tekur sér einhliða stóraukin völd stuttu áður en dómarar hugðust kveða upp úrskurð um lögmæti stjórnlagaþings og efri deildar þingsins. Fjölmenn mótmæli brjótast út gegn Morsi.

30. nóvember Stjórnlagaþingið lýkur gerð nýrrar stjórnarskrár í nokkrum flýti. Mótmæli halda áfram.

15. og 22. desember Ný stjórnarskrá samþykkt í þjóðaratkvæðagreiðslu. Kosningaþátttakan er 33 prósent, en 64 prósent þeirra studdu stjórnarskrána.

2013

25. janúar Hundruð þúsunda mæta á mótmælafundi gegn Morsi þegar tvö ár eru liðin frá upphafi mótmælanna gegn Mubarak.

30. júní Milljónir manna taka þátt í mótmælum í Kaíró og víðar gegn Morsi og krefjast afsagnar hans.