Ekvador sendir Obama fingurinn

Innanríkisráðuneyti Ekvador sendi frá sér tíst í dag þar sem Bandarískum stjórnvöldum eru boðnir 23 milljónir dollara til að nota í mannréttindafræðslu. Ljóst er að uppátækinu er ætlað að senda Obama langt nef, en bandarísk yfirvöld hafa hótað að beita Ekvador viðskiptaþvingunum veiti þeir uppljóstraranum Edward Snowden hæli.

Núningur hefur skapast á milli þjóðanna vegna málsins og útlit er fyrir frekari samskipti á svipuðum nótum. Forseti Ekvador, Rafael Correa, virðist ætla að feta slóð sósíalistans Hugo Chavez sem er nýlega fallinn frá með því að vera einn helsti andstæðingur bandarískra stjórnvalda í Suður-Ameríku.

„Ekvador mun ekki láta undan þrýstingi neins, og verslar ekki með gildi sín eða undirselur þau viðskiptalegum hagsmunum," sagði Fernando Alvarado, talsmaður ekvadorskra stjórnvalda á blaðamannafundi þar í landi.

Styrknum til Bandaríkjanna er ætlað að nýtast til að „forðast rof á friðhelgi einkalífs, pyntingar og annarskonar háttsemi sem niðursetja mannkynið." Upphæðin er sú sama og Ekvador hlýtur árlega frá Bandaríkjunum í ýmsa styrki.

Segja upp viðskiptum

„Ekvador segir upp einhliða og á óafturkræfan hátt tollaívilnunum sínum," sagði Alvarado. Tilefnið eru ummæli öldungadeildarþingmanns sem sagði að réttast væri að svipta Ekvador hverskyns tollaívilnunum veittu þau Snowden hæli.

Snowden er talinn vera á alþjóðaflugvellinum í Moskvu, þar sem hann reynir nú að komast til Ekvador.

Gagnrýnendur Correa segja uppátækið bera merki um hræsni, enda sýni hann sjálfur stjórnlyndi og beiti fjölmiðla kúgun heimafyrir.