Borin út úr tréhúsi sínu

Það eru ekki bara milljónir fullorðinna Bandaríkjamanna sem standa frammi fyrir því að vera bornir út af heimilum sínum vegna fasteignaskulda, því átta ára stúlka í bænum Emerson í New Jersey í Bandaríkjunum liggur undir hótunum að vera borin út úr tré-húsi sínu og að húsið verði rifið.

Foreldrar Katie Tenebruso hjálpuðu henni að byggja ansi veglegt hús uppi í tré í garði við hús fjölskyldunnar og gáfu henni það í afmælisgjöf í fyrra. Kostnaðurinn við bygginguna nam tæpum átta hundruð þúsund krónum. Katrie kann ákaflega vel við sig í tré-húsinu þar sem hún býður vinkonum sínum reglulega til te-drykkju og annarra samkvæma.

En nágranni hennar, sem kalla mætti Fúla á móti, er ekki eins ánægður með tré-húsið og Katie og hefur farið fram á það við skipulagsyfirvöld að húsið verði rifið, vegna þess að það sé byggt of hátt uppi í trénu. Paula móðir hennar segist hafa hringt á bæjarstjórnarskrifstofurnar áður en húsið var byggt og fengið þau svör að engin sérstök lög giltu um byggingu tré-húsa í bænum.

Málið var tekið fyrir í bæjardómi á í gær þar sem dómari gaf fjölskyldunni frest fram í næsta mánuð til að afla leyfa, því þrátt fyrir allt gilda reglugerðir um byggingar sem ná hærrra en 4,6 metra frá jörðu, en tré-hús Katie nær allt að 5,8 metra í loft upp. Fjöldi nágranna hefur lýst yfir stuðningi við Katie og vill koma í veg fyrir að hún verði flæmd úr tré-húsinu og það rifið.