Leið aldrei vel í návist Castros

Monica Stephens, fyrrverandi tengdadóttir Ariels Castro, segir að sér hafi aldrei liðið vel í návist hans.

Castro er ákærður fyrir mannrán og nauðganir í borginni Cleveland í Bandaríkjunum, og hefur málið vakið mikla athygli og óhug fólks víða um heim. Verði hann sakfelldur fyrir brotin gæti dauðarefsing beðið hans.

„Ég hafði aldrei áhuga á að kynnast honum náið,“ sagði Stephens í samtali við fréttamanninn Piers Morgan á CNN. „Fyrrverandi eiginmaður minn og móðir hans höfðu bæði sagt mér sögur af því hvernig hann hafði læst þau inni og barið þau.“

Stephens segir fyrrverandi eiginmann sinn hafa sætt misnotkun af hálfu föður síns frá barnæsku og að Castro hafi barið eiginkonu sína þegar hún var að jafna sig eftir heilaskurðaðgerð. Í einhverjum tilfellum hafi járnröri verið beitt við barsmíðarnar.

Þá segir hún að Castro hafi einnig beitt fjölskyldu sína andlegu ofbeldi og „komið fram við fjölskyldumeðlimi eins og þau væru gíslar.“

Lögmaður Castro varar við því að fjölmiðlar skrímslavæði Castro og að gögn liggi fyrir sem sanni það að hann sé ekki skrímsli. Mun Castro lýsa yfir sakleysi þegar hann kemur fyrir dómara.