Gott fyrir Eyjamenn að byrja mótið úti í Eyjum

Það verða ÍBV og ÍA sem spila fyrsta leikinn í Pepsi-deild karla í fótbolta þegar liðin mætast klukkan 16.00 á Hásteinsvelli í Vestmannaeyjum í dag. Hinir leikir dagsins hefjast síðan klukkutíma síðar.

Eyjamenn fagna því örugglega að spila fyrsta leik á heimavelli enda ekki slæmt fyrir Hermann Hreiðarsson að stýra ÍBV-liðinu í fyrsta sinn á Hásteinsvellinum þar sem hann lék einmitt sinn síðasta leik áður en hann fór út í atvinnumennsku í lok júlí 1997.

Það er mjög athyglisvert að skoða muninn á því þegar Eyjamenn byrja mótið úti í Eyjum miðað við það þegar þeir eiga fyrsta leik mótsins upp á landi.

Frá og með árinu 1994 hefur lið ÍBV spilað 8 heimaleiki og 9 útileiki í 1. umferð í efstu deild. Eyjaliðið hefur náð í 16 af 24 mögulegum stigum í heimaleikjunum (67 prósent) en aðeins 4 af 27 mögulegum stigum í útileikjunum (15 prósent). ÍBV hefur unnið í tvö síðustu skiptin sem þeir hafa byrjað mótið á Hásteinsvellinum (2006 og 2011) en tapað fjórum síðustu útileikjum sínum í 1. umferð.

Hér fyrir neðan má sjá samanburð á leikjum ÍBV í 1. umferð eftir því hvort þeir séu á heimavelli eða útivelli.

Leikir ÍBV í 1. umferð

Út í Vestmannaeyjum:

2011 Fram 1-0 sigur

2006 Keflavík 2-1 sigur

2003 KA 2-3 tap

2000 Fylkir 2-2 jafntefli

1999 Leiftur 5-0 sigur

1997 ÍA 3-1 sigur

1996 Leiftur 1-3 tap

1995 Valur 8-1 sigur

Samtals: 16 stig, markatala 24-11

Upp á landi:

2012 Selfoss 1-2 tap

2010 Fram 0-2 tap

2009 Fram 0-2 tap

2005 Fram 0-3 tap

2004 Grindavík 1-1 jafntefli

2002 KA 1-1 jafntefli

2001 Breiðablik 0-1 tap

1998 Þróttur 3-3 jafntefli

1994 Þór Ak. 0-0 jafntefli

Samtals: 4 stig, markatala 6-15