Netverjar hylla bjargvættinn

Ótrúlegir atburðir gærdagsins í borginni Cleveland í Bandaríkjunum hafa vakið heimsathygli, en þremur ungum konum sem hurfu fyrir áratug var bjargað úr húsi þriggja bræðra á sextugsaldri sem grunaðir eru um að hafa rænt þeim. Bræðurnir voru handteknir í kjölfarið.

Tvær kvennanna fundust bundnar inni í húsinu eftir að sú þriðja, Amanda Berry, náði að vekja athygli nágranna bræðranna, Charles Ramsey. Eftir að Ramsey sparkaði upp hurðinni hafði hann samband við neyðarlínuna og var konunum bjargað, auk sex ára gamallar stúlku sem fréttastofa AP segir að ein þeirra hafi alið í prísundinni.

Í kjölfar þessara óhugnalegu atburða er bjargvætturinn Ramsey, sem starfar sem uppvaskari á veitingahúsi, orðinn því sem næst heimsfrægur, og þá helst vegna spaugilegrar framkomu í sjónvarpsviðtölum við ABC og Fox og upptöku af símtali hans til neyðarlínunnar.

Netverjar hafa hyllt Ramsey í dag með því að hlekkja á viðtöl við hann og símtalið fræga, en það má hlusta á í spilaranum hér að ofan.