Fyrirvarinn yrði einn til tveir tímar

„Það er enginn hlaupandi um gangana eða neitt. Menn vinna bara sína venjulegu vinnu. Þetta er bara vegna örlítillar aukningar í bakgrunnsskjálftavirkni. Það gefur til kynna að virknin sé pínulítið meiri en venjulega," segir Magnús Tumi Guðmundsson, prófessor í jarðeðlisfræði hjá Jarðvísindastofnun Íslands. Almannavarnir lýstu í morgun yfir óvissustigi vegna hugsanlegs eldgoss í Heklu.

„Það er búið að taka í notkun ákveðið kerfi, sem er þannig að þegar það verður einhver virkni umfram bakgrunninn, sem er mjög rólegur í Heklu, þá eru gefin merki. Það eru nokkrir mjög litlir skjálftar sem hafa sést á síðustu dögum rétt norður við Heklu," segir Magnús Tumi í samtali við Vísi.

„Þetta eru fáir skjálftar en þarna er bara það lítil skjálftavirkni að Veðurstofan ákveður á grundvelli vinnureglna sem búið er að setja að nú sé Heklu gefið auga," segir Magnús Tumi og segir að það sé ekki farin nein atburðarrás af stað eins og var fyrir Heklugosið 2000. Hann býst við því að það muni berast viðvaranir af þessu tagi sem endi svo flestar í því að það gjósi ekki. „Það er bara eðli svona eftirlitskerfa," segir Magnús Tumi.

Hann segist þó alls ekki geta fullyrt að ekki muni gjósa. „Fyrirvarinn sem við höfum á Heklu er ekki nema einn til tveir tímar. Það er ekki fyrr en sú atburðarrás fer af stað með óróa og smáskjálftum, þá vitum við þetta. Vegna þess hvernig Hekla hefur hegðað sér getum við ekki sagt hvenær Hekla fer af stað," segir hann. Hann tekur þó fram að líkurnar á því að þetta sé byrjun á einhverju séu ekki mjög stórar. „En það getur enginn sagt að það muni ekki gjósa í Heklu á morgun. Það er bara ekki hægt. Málið er bara það að það er óvissa í þessu og rétt að fylgjast með þessu," segir hann.