Sviðsetti mannrán til að forðast heift kærustunnar

Tæplega fertugur Bandaríkjamaður í New York hefur verið ákærður fyrir að hafa afvegaleitt lögreglu með því að skipuleggja sitt eigið mannrán. Maðurinn, sem heitir Rahmell Pattway og er lýst sem góðkunningja lögreglunnar, fannst á bílastæði í borginni á dögunum.

Samkvæmt upplýsingum New York Post var aðkoman ekki falleg. Pattway var illa barinn og múlbundinn. Þá voru hendur hans og fætur tjóðraðar.

Grunsemdir lögreglu vöknuðu eftir að í ljós kom að hinir meintu mannræningjar höfðu ekki haft fyrir því að skera á límbandsrúlluna sem enn var föst við úlnlið Pattways.

Á endanum játaði Pattway. Hann gaf þá útskýringu að hann hefði óttast heift kærustu sinnar enda hafði hann farið í nokkurra vikna frí án þess láta hana vita.

„Hann er algjör hálfviti," sagði lögreglumaður í samtali við New York Post. „Þetta var lágkúruleg tilraun til að blekkja konuna."