Kolbeinn og félagar björguðu jafntefli

Kolbeinn Sigþórsson spilaði allan leikinn þegar að Ajax gerði 1-1 jafntefli við Den Haag í hollensku úrvalsdeildinni í dag.

Ajax lenti undir á 30. mínútu er Tjaronn Chery kom Den Haag yfir og leit lengi vel út fyrir að það yrði eina mark leiksins.

En danski miðvallarleikmaðurinn Lasse Schöne bjargaði sínum mönnum þegar hann skoraði jöfnunarmark Ajax á 85. mínútu.

Ajax sótti þó stíft í leiknum og Kolbeinn komst tvívegis í gott færi. Í fyrra skiptið var varið á línu hjá honum auk þess sem að markvörður Den Haag varði frá honum í góðu færi.

Reyndar vildu Ajax-menn meina að boltinn hafi farið yfir línuna í fyrra færi Kolbeins en dómarinn dæmdi ekki mark.

Ajax hefði með sigri getað jafnað topplið PSV að stigum þar sem að liðið tapaði í dag fyrir Feyenoord. PSV er því enn á toppnum með 50 stig en Ajax er í öðru sæti með 48 stig. Feyenoord er nú með 47 stig í þriðja sætinu.