Landsliðsmaður í knattspyrnu kom úr skápnum

Bandaríkjamaðurinn Robbie Rogers ákvað í dag að tilkynna opinberlega að hann væri samkynhneigður. Um leið sagðist hann vera hættur að spila fótbolta, aðeins 25 ára gamall.

Rogers var á mála hjá Leeds síðast en var leystur undan samningi sínum við félagið í síðasta mánuði eftir að hafa verið í láni hjá C-deildarliðinu Stevenage.

Rogers á að baki átján leiki með bandaríska landsliðinu en lengst af lék hann með Columbus Crew í heimalandinu, þar til hann fór til Leeds í fyrra.

„Ég hélt alltaf að fótboltinn gæti falið þetta leyndarmál. Fótboltinn var mín undankomuleið, tilgangur í lífinu og það sem einkenndi mig," skrifaði hann í pistli sem birtist á heimasíðu hans.

„Nú er tímabært að stíga til hliðar frá knattspyrnunni. Undanfarin 25 ár hef ég verið hræddur - hræddur við að sýna mitt rétta andlit."

„Leyndarmál geta skaðað mann að innan. Fólki er tíðrætt um heiðarleika og hvað hann er einfaldur. En reyndu að útskýra fyrir þínum nánustu í fyrsta sinn eftir 25 ár að þú sért samkynhneigður."

„Fótboltinn faldi leyndarmálið mitt og veitti mér meiri ánægju en ég hefði getað ímyndað mér. Ég mun ávallt vera þakklátur fyrir minn knattspyrnuferil. En nú er leyndarmálið mitt farið. Ég er frjáls maður og get lifað mínu lífi eins og skaparinn ætlaði mér."

Í fréttum enskra fjölmiðla segir að aðeins tveir knattspyrnumenn hafi opinberað samkynhneigð sína. Fyrstur var Justin Fashanu sem gerði það árið 1990 en stytti sér svo aldur átta árum síðar, þegar hann var 37 ára gamall.

Hinn er Anton Hysen, sem leikur í Svíþjóð. Hann kom úr skápnum í viðtali árið 2011.