Sérsveit lagði hald á fíkniefni að verðmæti 400 milljónir í Kristjaníu

Lögreglan í Kaupmannahöfn lagði hald á fíkniefni að verðmæti 17 milljónir danskra króna eða tæplega 400 milljónir króna í Kristjaníu í janúarmánuði.

Það er sérsveitin Task Force Pusherstreet sem stendur á bakvið þennan árangur. Sveitin hefur það eina verkefni að ganga á milli bols og höfuðs á þeim sem stunda fíkniefnasölu í Kristjaníu og þeim sem flytja fíkniefnin inn á staðinn.

Í aðgerðum sínum í Kristjaníu í síðasta mánuði lagði þessi sérsveit hald á 132 kíló af hassi, 62 kíló af marijúana eða skúnki og nærri 15.000 jónur. Götuverðmæti þessara efna er metið á um 17 milljónir danskra króna.

Í frétt í Jyllands Posten um málið segir að þar að auki hafi Task Force Pusherstreet lagt hald á 22 vopn, þar á meðal fimm skammbyssur.

Poul Kjeldsen yfirmaður sérsveitarinnar segir að skammbyssurnar sem sveitin náði sýni því miður að skipulög glæpasamtök séu að leggja Kristjaníu undir sig. Einnig hafi magnið af fíkniefnum sem sveitin nái vaxið stöðugt milli mánaða þann tíma sem sérsveitin hefur starfað.

Að auki sektaði sérsveitin nær 170 ökumenn við Kristjaníu fyrir akstur undir áhrifum fíkniefna í janúar.