Heimildarmynd um barnaníðinga

Louis Theroux hefur getið sér gott orð í heimildarmyndagerð. Honum þykir takast vel að kafa djúpt í þau mál sem eru til umfjöllunar hverju sinni, kynnast viðmælendum sínum en um leið halda hlutleysi sínu við heimildarmyndagerðina.

Í heimildarmynd sem frumsýnd var á BBC vorið 2009 skyggnist Theroux inn í heim barnaníðinga. Hann sækir heim geðsjúkrahús í Kaliforníu-fylki í Bandaríkjunum sem hýsir 500 barnaníðinga.

Brot þeirra þykja svo alvarleg að ekki er reiknað með því að þeim verði nokkru sinni hleypt lausum af sjúkrahúsinu. Theroux kynnist barnaníðingunum og fylgist með þeirri meðferð sem þeir gangast undir. Hann berst við hvort hann geti trúað orðum barnaníðinganna enda eiga þeir sér langa sögu þegar lygar og svik eru annars vegar.

Málefni barnaníðinga hafa verið í brennidepli hér á landi undanfarnar vikur. Sýnist sitt hverjum hvernig bregðast á við vandanum.

Hægt er að horfa á heimildarmyndina hér að neðan.