Hætta á að stórt smástirni lendi í árekstri við gervihnött

Smástirni sem er 45 metrar að breidd og 130.000 tonn að þyngd mun svífa svo nálægt jörðinni eftir átta daga að hætta er á að það lendi í árekstri við gervihnött.

Stjarnfræðingar hjá geimvísindastofnun Bandaríkjanna NASA segja að þótt smástirni þetta fari svo nálægt jörðinni sé engin hætta á að það hrapi til jarðar með ófyrirsjáanlegum afleiðingum.

Í frétt um málið í Politiken segir að þegar smástirni þetta svífur framhjá verði það í aðeins 27.000 kílómetra fjarlægð frá jörðinni. Almenningur getur því vel séð það með litlum stjörnusjónaukum, það er ef viðkomandi er í austurhluta Evrópu, Asíu eða Ástralíu.

Í þessari fjarlægð eru margir gervihnettir á braut um jörðu og því hætta á að smástirnið rekist á einhvern þeirra. Stjarnfræðingar NASA telja þó að litlar líkur séu á slíkum árekstri.

Fram kemur að smástirni af þessari stærð svífi framhjá jörðinni á 40 ára fresti að jafnaði. Eitt þeirra skall til jarðar í Tunguska héraðinu í Síberíu árið 1908 og olli skaða á við stærstu kjarnorkusprengjur.

Krafturinn í sprengingunni 1908 er talinn hafa numið 30 megatonnum af TNT. Til samanburðar var kjarnorkusprengjan sem varpað var á Hiroshima 16 kílótonn að stærð eða nær tvöþúsund falt kraftminni en sprengingin í Tunguska.