Gengjastríð í uppsiglingu í bænum Köge á Sjálandi

Danska lögreglan óttast að gengjastríð sé í uppsiglingu milli tveggja glæpagengja í bænum Köge á Sjálandi í Danmörku.

Gengin sem hér um ræðir eru annarsvegar Badidos og hinsvegar hópur sem kallar sig Black Cobra. Áður hefur komið til skotbardaga milli meðlima þessara gengja og alvarlegra líkamsárása en staðan í Köge hafði verið nokkuð róleg síðustu vikur þar til í gærdag.

Í frétt um málið í Ekstra Bladet segir að skothríð hafi dunið á tattústofu í Köge sem tengist Bandidos. Þeir sem stóðu að skotárásinni voru að sögn vitna tveir grímuklæddir menn sem flúðu síðan af vettvangi á rauðri skellinöðru. Ekki er vitað til þess að nokkur hafi orðið fyrir skotum í árásinni.

Nóttina áður hafði einn af meðlimum Badidos í Köge verið skotinn í gegnum hnéið í kjölfar þess að þrír grímuklæddir menn réðust inn á heimili hans og gengu í skrokk á honum.Tvítug kærasta hans var í íbúðinni en Ekstra Bladet segir að hún hafi sloppið við meiðsli.

Danska lögreglan gerir nú það sem hún getur til að koma í veg fyrir að þetta gengjastríð fari úr böndunum í Köge.