Skrifuðu á kynfæri sofandi stúlku eftir að þeir misnotuðu hana

Móðir Audrie Pott, fimmtán ára stúlkunnar sem svipti sig lífi í fyrra í kjölfar kynferðisárásar, hélt blaðamannafund ásamt lögmanni sínum í Kaliforníufylki Bandaríkjanna í gær og tjáði sig opinberlega um atburðinn í fyrsta skipti.

Árásin var gerð í veislu í heimaborg Pott, Santa Clara, en hún hafði sofnað áfengissvefni í svefnherbergi húsráðanda. Þegar hún vaknaði höfðu árásarmennirnir skrifað á ýmsa líkamshluta hennar, þar á meðal kynfæri hennar.

„Þeir skrifuðu „Xxxxx var hér“ á fætur hennar,“ sagði lögfræðingur Pott-fjölskyldunnar, en hann notaði ekki raunveruleg nöfn hinna grunuðu á blaðamannafundinum.“

Næstu daga eftir árásina rann upp fyrir Pott hvað hafði gerst, og í skólanum varð hún vitni að því að hópur samnemenda hennar stóð og skoðaði niðurlægjandi myndir af henni á farsíma.

„Ég hef orðspor vegna kvölds sem ég man ekki eftir og allur skólinn veit af því,“ skrifaði Pott til vinar síns í Facebook-skilaboðum.

Rúmri viku eftir árásina bað Pott móður sína að sækja sig í skólann, og sagði henni að hún gæti ekki meira. Hún vildi þó ekki segja henni hvað væri að. Sama dag hengdi hún sig á heimili þeirra.

Þrír sextán ára drengir voru handteknir á dögunum vegna málsins, og hafa þeir verið ákærðir fyrir árásina og fyrir að hafa barnaníðefni í fórum sínum, en þeir tóku ljósmyndir af árásinni. Krefjast lögmenn fjölskyldunnar þess að réttað verði yfir þeim sem fullorðnum.

Lög Kaliforníufylkis gera greinarmun á því hvort þolandi veitir mótspyrnu eða ekki og er hámarksrefsing fyrir brotin því mun lægri en ef Pott hefði verið vakandi.

Þessu vill móðir hennar breyta, og vinnur að því ásamt lögmanni sínum að fá í gegn ný lög, „Audrie-lögin“, nefnd í höfuðið á dótturinni.