Handteknir fyrir kynferðisárás eftir að þolandi framdi sjálfsvíg

Þrír sextán ára piltar hafa verið handteknir vegna gruns um kynferðisárás á fimmtán ára stúlku í Kaliforníufylki Bandaríkjanna, en hún framdi sjálfsvíg átta dögum eftir árásina.

Stúlkan, sem hét Audrie Pott, hengdi sig þegar ljósmyndir af árásinni voru birtar á internetinu, en drengirnir réðust á hana í veislu á meðan hún svaf áfengissvefni.

Pott sagði á Facebook-síðu sinni að líf hennar væri eyðilagt og að hún væri að upplifa versta dag lífs síns, rétt áður en hún svipti sig lífi.

Drengirnir voru handteknir í vikunni, en málið líkist óneitanlega máli Rehtaeh Parsons, sautján ára stúlku frá Halifax í Kanada, sem framdi sjálfsvíg í kjölfar þess að ljósmyndir af nauðgun hennar fóru í umferð.