Kerry segir 1.429 manns hafa látist í efnavopnaárásinni

John Kerry, utanríkisráðherra Bandaríkjanna, skýrði rétt í þessu frá því að efnavopnaárásin í úthverfum Damaskusborgar í síðustu viku hafi kostað 1.429 manns lífið, þar af að minnsta kosti 429 börn.

Hann segir engan vafa leika á því að það hafi verið Sýrlandsstjórn sem stóð að þessum árásum. Þremur dögum fyrir árásina hafi menn á vegum stjórnarhersins verið á vettvangi að kanna aðstæður og undirbúa árásina.

Hann segir leyniþjónustumenn Bandaríkjanna hafa nákvæmar upplýsingar um það sem gerðist. Þeir viti nákvæmlega hvaðan og klukkan hvað flugskeytum hafi verið skotið á loft, og hvar þau lentu og klukkan hvað. Þeim hafi öllum verið skotið frá stöðum, sem stjórnarherinn hefur á valdi sínu, og komið niður á stöðum sem uppreisnarmenn höfðu á valdi sínu.

 

„Þetta snýst ekki lengur um það hvað við vitum heldur hvað við ætlum að gera,” segir Kerry. 

Rannsókn Sameinuðu þjóðanna á vettvangi í Damaskus muni ekki leiða neitt í ljós, sem bandaríska leyniþjónustan veit ekki nú þegar. Sú rannsókn muni ekki sýna fram á hver ber ábyrgð á árásinni, heldur aðeins hvort efnavopn hafi verið notuð.

Bandaríkjastjórn muni nú ræða frekar við bandamenn sína, ásamt því að ræða við Bandaríkjaþing um framhaldið.

Hann segir trúverðugleika Bandaríkjanna í húfi auk þess sem þeim beri skylda til að tryggja að stjórn Bashar al Assads í Sýrlandi komist ekki refsilaust upp með að nota efnavopn gegn eigin þjóð.

Upplýsingarnar, sem hann skýrði frá, hafa verið birtar á vefsíðu bandaríska utanríkisráðuneytisins og sendar fjölmiðlum víða um heim.