Fyrrverandi Bandaríkjaforsetar um ástandið í Sýrlandi

Jimmy Carter, fyrrverandi forseti Bandaríkjanna, segir hernaðarlega íhlutun Bandaríkjamanna í Sýrlandi án stuðnings frá Sameinuðu þjóðunum vera ólöglega. Hann hvetur til friðarviðræðna í staðinn.

Hann segir aðgerðirnar myndu brjóta alþjóðalög ef þær fengju ekki samþykki hjá öryggisráði Sameinuðu þjóðanna og Arababandalaginu, og telur forsetinn fyrrverandi að ólíklegt sé að hernaðaraðgerðir myndu breyta framgangi borgarastríðsins sem geysar í Sýrlandi.

Þá hefur annar fyrrverandi Bandaríkjaforseti, George Bush yngri, tjáð sig um ástandið, og segir hann Barack Obama, núverandi forseta, standa frammi fyrir erfiðri ákvörðun. Hann bætti því við í samtali sínu við FOX-sjónvarpsstöðina að hann væri „ekki aðdáandi“ Bashars al-Assad. Að öðru leyti reyndi hann að tjá sig sem minnst um málið.

John Kerry, utanríkisráðherra Bandaríkjanna og mótframbjóðandi Bush í forsetakosningunum 2004, skýrði frá því í dag að efnavopnaárásin í úthverfum Damaskusborgar í síðustu viku hafi kostað 1.429 manns lífið, þar af að minnsta kosti 429 börn.

Hann segir engan vafa leika á því að Sýrlandsstjórn hafi staðið að árásunum. Þremur dögum fyrir hana hafi menn á vegum stjórnarhersins verið á vettvangi að kanna aðstæður og undirbúa árásina.

Obama hefur ekki tekið ákvörðun um hvort hann muni fyrirskipa árásir á Sýrland og í gærkvöldi hafnaði breska þingið tillögu David Camerons forsætisráðherra um hernaðaraðgerðir gegn Sýrlandsstjórn.