6,6 milljónir barna yngri en fimm ára létust á síðasta ári

Dánartíðni barna, innan fimm ára aldurs, hefur minnkað um helming frá árinu 1990. 

Engu að síður létu 6,6 milljónir barna, yngri en fimm ára, lífið á síðasta ári, eða um 18 þúsund á degi hverjum, að því er fram kemur í nýrri skýrslu frá UNICEF, Barnahjálp Sameinuðu þjóðanna.

Nærri helmingur barnadauðans átti sér stað í fimm löndum: Nígeríu, Kongó, Indlandi, Pakistan og Kína.

Flest þessara barna, eða um fimm þúsund á degi hverjum, létu lífið af völdum malaríu, lungnabólgu eða magakveisu.

Árið 1990 létu 12,6 milljónir barna innan fimm ára lífið, og síðan þá hafa 216 milljónir barna látið lífið áður en þau náðu fimm ára aldri.

Framfarir á þessu sviði hafa hins vegar orðið til þess að bjarga lífi 90 milljóna barna, sem látist hefðu ef dánartíðnin væri enn sú sama og árið 1990.