Sex kirkjum lokað í Kaupmannahöfn

Sex kirkjum í Kaupmannahöfn verður lokað fyrir árslok og tvær aðrar fá breytt hlutverk. Marianna Jelved menningarráðherra kynnti þessa ákvörðun í dag og Politiken segir frá. Kirkjurnar sem lokað verður eru: Samuelskirkja, Absalonskirkja Gethsemanekirkja og kirkjurnar í Blågård, Utterslev og Bavnehøj.

Kirkjunum er lokað þar sem íbúaflóran í hverfunum sem þær þjóna hefur breyst mikið, aðsókn hefur minnkað og athöfnum fækkað verulega. Á móti hefur íbúum fjölgað í öðrum hverfum Kaupmannahafnar og stendur nú til að byggja þrjár nýjar kirkjur, við Suðurhöfn, Norðurhöfn og Ørestad.

Aldrei áður hefur eins mörgum dönskum kirkjum verið lokað á einu bretti, en frá árinu 1949 hefur alls níu kirkjum verið lokað þar í landi. Fleiri kirkjum verður eflaust lokað á næstunni, en Manu Sareen kirkjumálaráðherra hefur líst því yfir að tilefni sé til að skoða grundvöll um 200 kirkna á landsvísu.

„Við verðum að tala opinskátt um kirkjulokanir, ef við ætlum að tryggja það að fjármunir þjóðkirkjunnar nýtist sem best,” segir Sareen. „Tómar kirkjur þjóna þjóna ekki hagsmunum neinna, allra síst meðlima þjóðkirkjunnar.”