Færeyjar vilja aðgang að innri markaði ESB

Stjórnvöld í Færeyjum stefna að því að verða hluti af innri markaði ESB. Markmiðið er að geta notið þeirra möguleika sem sterkt markaðssvæði eins og  ESB býður upp á. Færeyjar eru í ríkjasambandi við Danmörku, sem er aðildarríki ESB, en standa sjálfir utan sambandsins. Politiken segir frá.

Samskiptin milli Færeyja og ESB haf verið stirð að undanförnu, sérstaklega eftir að aðildarríkin samþykktu á dögunum að beita refsiaðgerðum gegn Færeyjum vegna deilna um veiðar úr norsk-íslenska síldarstofninum.

„Þegar við höfum leyst síldarmálið förum við beint inn í viðræður við ESB um að ná fram nýjum samningi,“ segir Kaj Leo Holm Johannesen, lögmaður Færeyja, í samtali við Politiken.

Holm Johannesen bætir því við að hann hafi rætt málið við Helle Thorning-Schmidt, forsætisráðherra Danmerkur, sem er að hans sögn „jákvæð og fylgjandi þessum hugmyndum“.  

Ráðuneyti Holm Johannesens mun sjá um viðræðurnar ásamt danska utanríkisráðuneytinu. Ekki þurfi að bera tilbúinn samning undir færeysku þjóðina í þjóðaratkvæðagreiðslu.