Móðir ræningjans brenndi dýrmæt listaverk í ofni sínum

Sérfræðingar við þjóðminjasafnið í Rúmeníu hafa fundið leifar af málningu, sem einungis var notuð á 19. og 20. öld, í ösku úr ofni Olgu nokkurrar Dogaru.

Hún er móðir manns, sem grunaður er um að hafa stolið dýrmætum listaverkum í Hollandi á síðasta ári. Hún viðurkenndi í fyrstu að hafa brennt listaverkin til að vernda son sinn, en neitaði því síðar að hafa gert það.

Listaverkin sjö, sem stolið var, eru eftir heimsþekkta málara og metin á hundruð milljóna evra. Allt bendir nú til þess að þau, eða í það minnsta einhver þeirra, hafi orðið eldinum að bráð á heimili Olgu Dogaru í Rúmeníu.

Verkin eru eftir Pablo Picasso, Henri Matisse, Claude Monet, Paul Gauguin, Meyer de Haan og Lucien Freud.