Óður bílstjóri olli dauðsfalli

Einn lést og ellefu aðrir særðust þegar óður bílstjóri ók niður hóps fólks á vinsælli gönguleið í Los Angeles í Bandaríkjunum í nótt. Ekki er vitað hvað ökumanninum gekk til en nær öruggt þykir að um viljaverk hafi verið að ræða.

Hinir særðu voru fluttir á sjúkrahús en á meðal þeirra er ungt barn. Að minnsta kosti einn er lífshættulega slasaður og vart hugað líf, tveir aðrir eru alvarlega slasaðir.

Atvikið átti sér stað Venice-gönguleiðinni en hún er víðfræg sem nokkurs konar menningarmiðja Los Angeles-borgar. Á góðri helgi eru um 150 þúsund á eða við brautina.

Ljóst er að ökumaðurinn var á miklum hraða þegar hann beygði inn á gangstíginn. Fréttamiðlar vestanhafs hafa eftir vitnum að bílstjórinn hafi haft stjórn á bílnum og gefið í þegar hann nálgaðist fólkið. Öryggismyndavélar náðu myndum af atvikinu en þar má sjá hundruði gesta á Venice-ströndinni reyna að forðast bílinn.

Vitnin hafa jafnframt lýst slysstaðnum sem hálfgerðum vígvelli og var gangstéttinn þakin blóði þegar sjúkraflutningamenn komu á vettvang.

Bílstjórinn hvarf af vettvangi en hann gaf sig fram við lögreglu seint í nótt. Tilefni voðaverksins liggur þó ekki fyrir og verður maðurinn yfirheyrður í dag.