Bandaríkin loka 20 sendiherrabústöðum

Bandarísk yfirvöld lokuðu í dag sendiherrabústöðum sínum vítt og breitt um Austurlönd nær. Lokanirnar taka meðal annars til sendiráða í Bagdad, Dúbaí, Kúveit og Kaíró í Egyptalandi. Sendiráðin sem lokað er eru yfir 20 talsins.

Tilefnið er yfirvofandi árás hryðjuverkasamtakanna al-Qaeda. Fulltrúar frá utanríkisráðuneyti Bandaríkjanna hafa fundað með stjórnendum leyniþjónustu Bandaríkjanna, alríkislögreglunni og Barack Obama, Bandaríkjaforseta. Bandaríska stórblaðið The New York Times greinir frá því í dag að líkur séu á að skotmörk al-Qaeda séu miðpunktar almenningssamgangna nokkurra stórborga ásamt innviðum ferðaþjónustu.

Þá voru viðvaranir gefnar út til allra bandarískra ríkisborgara á faraldsfæti í gær um að hafa varann á. Fréttamiðlar vestanhafs hafa greint frá því að viðbúnaðurinn tengist fangelsisflótta fjölmargra liðsmanna al-Qaeda í Írak, Pakistan og Líbíu á síðustu dögum.

Bandarísk yfirvöld byggja grunsemdir sínar á rafrænum samskiptum milli háttsettra stjórnenda al-Qaeda. Grunur leikur á að samtökin hafi staðið að baki hryðjuverkaárásum og öðrum ódæðum síðustu daga.

Fréttaveitan AFP hefur eftir talsmanni Barack Obama, Bandaríkjaforseta, að áform hryðjuverkasamtakanna séu tekin alvarlega og að allt verði gert til að tryggja öryggi bandarískra ríkisborgara.

Upplýsingar úr utanríkisráðuneyti Bandaríkjanna heldur óljósar. Í tilkynningu frá ráðuneytinu kemur fram að al-Qaeda hyggist fremja ódæði af einhverjum toga í Austurlöndum nær eða Norður-Afríku.

Viðvörunin nær til 31. ágúst næstkomandi og eru bandarískir ríkisborgarar hvattir til að vera á varðbergi þegar þeir ferðast út fyrir landsteinana.

Viðbúnaður bandarískra stjórnvalda kemur þó ekki á óvart enda er tæpt ár síðan hryðjuverkamenn réðust á ræðismannsskrifstofu Bandaríkjanna í Benghazi í Líbíu. Fjórir Bandaríkjamenn létust í árásinni, þar á meðal sendiherra Bandaríkjanna í Líbíu.