Kristjanía gegn kókaíni

Kókaín einkennir næturlíf Kaupmannahafnar og fríríkið Kristjanía hefur ekki farið varhluta af því. Þessi staðreynd hefur orðið til þess að íbúar, hasssölumenn og veitingastaðaeigendur á staðnum hafa tekið höndum saman og vilja nú koma í veg fyrir neyslu efnisins. Birgitte Wester, sem hefur búið í Kristjaníu frá 1979, hannaði herferð af þessu tilefni. Hún segir marga telja kókaínið góða viðbót við áfengisdrykkju, menn geti þá drukkið lengur en þeir viti ekki hversu skaðlegt kókaín er.

Kókaínmenn gerðir brottrækir

Það kann að koma einhverjum á óvart að Kristjanía, sem þekkt er fyrir frjálslyndi, ekki síst gagnvart vímugjöfum, skuli leggja til atlögu gegn kókaíni. Þetta gerðu íbúar fríríkisins einmitt árið 1979, en þá lögðust íbúar á eitt og úthýstu harðari efnum á borð við heróín og amfetamín. Nú er sama uppi á teningnum gagnvart kókaíninu.

Herferðin er hafin undir slagorðinu að kókaín sé eitur og sá sem þess neytir má gera ráð fyrir því að vera gerður útlægur úr Kristjaníu allt frá þremur mánuðum upp í eilífðarútskúfun. Kristjaníubúar hafa fest kaup á ýmsum búnaði, til að mynda eiturlyfjamæli, sambærilegan þeim sem notaður er af lögreglunni, og á útfjólubláu ljósi sem lýsir upp hvítt duft. Hönnuð hafa verið merki sem sett eru á jakka og boli og verður veggspjöldum dreift um allt svæðið. Á næturna mun svo starfa sérstök nátthrafnaherdeild sem vaktar svæðið. Hún mun samanstanda af aktivistum, foreldrum, hasssölumönnum og starfsmönnum á svæðinu.

Starf lögreglu að rannsaka - dómstóla að dæma

Birgitta segir að allt sé vaðandi í kókaíni í Kaupmannahöfn, pokar um efnið liggi eins og hráviði víðsvegar um svæðið og þess vegna bregðist íbúar Kristjaníu nú við. Verði einhver uppvís að notkun harðra efna verður viðkomandi vísað vinsamlega en afdráttarlaust að útgangshliði.

Vagn Greve, prófessor í refsirétti, bendir á að aðgerðirnar gætu brotið í bága við hegningarlög. ,,Hinn almenni borgari má ekki ganga um og leika lögreglumann," segir hann og leggur áherslu á að það megi ekki hafa í hótunum við einstakling sem á að reka af svæðinu.

Aðstoðaryfirlögregluþjónninn Poul Kjeldsen segir lögregluna eins og er styðja þessa herferð Kristjaníu gegn hörðum efnum. Hann segist þó vilja minna á það sé hlutverk lögreglunnar og dómstóla að rannsaka og dæma. „Síðan gæti ég vel hugsað mér samskonar liðveislu gegn ódulinni sölu kannabisefna," bætir hann við að lokum.