Lögregla umkringir heimili veiðiþjófs í Austurríki

Lögregla í Austurríki hefur umkringt hús grunaðs veiðiþjófs, eftir að hann skaut tvo lögreglumenn og sjúkraflutningamann. Umsátrið er í skógi nálægt skíðasvæðinu í Annaberg í Ölpunum en bærinn er um sextíu og fimm kílómetra vestan við höfuðborgina Vín.

Svo virðist sem maðurinn hafi verið staðinn að verki við veiðiþjófnað í skóginum en að honum hafi tekist að flýja undan lögreglunni á bíl og lokaði hann sig af í húsi sínu í skóginum. Til viðbótar við þá þrjá sem hafa orðið fyrir skotsárum er eins lögreglumanns saknað að því er segir á fréttavef BBC. Ástand þeirra sem fyrir skotunum urðu, er óljóst á þessari stundu.