Lögreglan kallar eftir hjálp

Lögreglan í Gautaborg vill hjálp annarra lögregluumdæma í Svíþjóð til þess að stöðva gengjamorðin í borginni. Á þessu ári hafa að minnsta kosti fimm morð verið framin í tengslum við átök stríðandi fylkinga glæpamanna. Síðastliðið miðvikudagskvöld voru tveir menn skotnir til bana í Gautaborg. Talið er að morðin á þeim tengist skipulagðri glæpastarfsemi, að því er kemur fram í sænskum fjölmiðlum.

Lögreglan í Gautaborg kveðst sjá samband milli morðanna sem framin hafa verið en vill ekki tjá sig frekar um hvernig því er háttað. Óttast er að fleiri fleiri skotárásir fylgi í kjölfar morðanna á miðvikudaginn. Haft er eftir Sven Ahlbin yfirlögregluþjóni að auðvelt sé að komast yfir vopn en erfitt sé að fá menn til að segja frá. Lögreglan vonast nú til einhver þori að rjúfa þögnina, ekki bara vegna morðanna á miðvikudaginn, heldur einnig vegna fjölda annarra ofbeldisverka gengjanna.

Enginn hefur verið handtekinn vegna skotárásanna á miðvikudagskvöldið en fórnarlömbin voru svokallaðir góðkunningjar lögreglunnar.

Árið 2011 var tilkynnt um 24 skotárásir í Gautaborg en 33 í fyrra. Það sem af er þessu ári eru skotárásirnar orðnar 27.