Bandaríkjaþing frestar gjaldþroti

Leiðtogar demókrata og repúblikana í öldungadeild Bandaríkjaþings hafa náð samkomulagi í harðvítugri fjárlagadeilu, sem nærri var búin að gera ríkissjóð Bandaríkjanna gjaldþrota.

Samkomulagið felst í því að ríkið fær heimild til fjármögnunar til 15. janúar og þar með er tryggt að ekki verður greiðslufall á afborgunum ríkisskulda fyrr en í fyrsta lagi 7. febrúar.

Þetta er því aðeins bráðabirgðalausn. Báðar þingdeildir eiga enn eftir að greiða atkvæði um samkomulagið, og er talið að nægilega margir repúblikanar hyggist samþykkja það í fulltrúadeild til að hægt verði að afhenda Barack Obama lögin til undirritunar í tæka tíð áður en ríkissjóður yrði gjaldþrota, sem myndi annars gerast annað kvöld.

Ekki er hróflað við heilbrigðislöggjöf Obama, sem repúblikanar höfðu gert kröfur um að yrði afnumin eða í það minnsta frestað. Þó var samþykkt að bæta ákvæði við heilbrigðislöggjöfina um að kanna þurfi sérstaklega hvort þiggjendur bóta muni í raun þurfa á fé úr ríkissjóði að halda.

Obama Bandaríkjaforseti hefur fagnað samkomulaginu og segist treysta því að geta undirritað lögin fljótlega.

Strax er þó komið í ljós að enn er mikill ágreiningur innan Repúblikanaflokksins um málið.