Týndist fimm ára gamall á Indlandi - Fann fjölskyldu sína eftir 25 ár

30 ára gamall Indverskur maður, Saroo Brierley, sem týndist í Indlandi þegar hann var fimm ára hefur nú fundið indversku fjölskyldu sína aftur, þökk sé Google Earth. Þetta kemur fram á Gizmodo.com.

Saroo sem var fimm ára gamall árið 1987, fór frá heimili sínu til þess að betla peninga, hann átti síðan að taka lest heim til sín aftur. Þegar hann settist um borð í lestinni sofnaði hann og vaknaði ekki fyrr en hann var komin á hinn enda landsins.

Hann gat ekki sagt til sín og því var ómögulegt að finna út hvaðan hann var. Hann var því að lokum ættleiddur til Ástralíu. Hann mundi alltaf eftir fjölskyldu sinni í Indlandi og dreymdi um að hitta þau aftur.

Ástralska móðir hans hengdi upp landakort af Indlandi í herberginu hans og hann hélt minningunni um það hvernig lestarstöðin þar sem hann átti að fara út á leit út, lifandi í huganum.

Með því að fara inn á Google Earth tókst honum að rekja sig áfram þar til hann rakst á lestarstöðina sem hann hafði alltaf hugsað um. Hann fór á staðinn og gekk leiðina heim til sín eins og hann minnti að hún væri. Eftir að hafa gengið í smá stund rakst hann á þrjár konur og hann kannaðist strax við eina, það var móðir hans.

Hún þekkti son sinn strax og gekk að honum og tók utan um hann.

„Fjölskyldan er sameinuð á ný, móðir mín þarf ekki að deyja í óvissu um hvað hafi orðið um son hennar,“ segir Saroo. „Þetta var eins og að leita að nál í heystakki, en nálin var þarna.“

Hér fyrir neðan má sjá myndband sem Google framleiddi og þar má sjá Saroo segja sögu sína.