92 börnum bjargað úr klóm mannræningja

Lögregluyfirvöld í Kína hafa handtekið 301 manns sem grunaðir eru um að tengjast stórum mansalshring þar í landi en alls tókst lögreglunni að bjarga 92 börnum og tveimur konum í aðgerðum sínum. Börnin voru þegar send til skoðunar á sjúkrahús en einhver þeirra dvelja nú á barnaheimilum í Zhengzhou.

Aðgerð lögreglunnar er ein sú stærsta sinnar tegundar í fjölmörg ár en rannsókn á mansalshringnum hefur staðið yfir frá því í mars á þessu ári. Lögreglan segir að þeir aðilar sem tengdust mansalshringnum hafi fylgt ákveðnu mynstri. Mannræningjarnir rændu börnunum í Suðvesturhluta Kína og keyrðu síðan með þau í úthverfin þar sem þeim var komið í hendur annarra mannræningja.

Zhang Wenli, yfirmaður barnaheimilisins í Zhengzhou, segir að unnið sé að því að finna líffræðilega foreldra barnanna.

Mansal hefur aukist í Kína undanfarin ár og er ástæðan talin vera sú takmörkun sem foreldrum er gefin í barneignum, en pör í þéttbýli mega einungis eignast eitt barn.

Árið 2011 sögðu lögregluyfirvöld í Kína að frá árinu 2009 hafi rúmlega 13.000 börnum og um 23.000 konum verið bjargað úr klóm mannræningja.

Það er Sky News sem greinir frá.