Handtóku mann sem hótaði að sprengja hús Stórþingsins í Osló

Sérsveit norsku lögreglunnar handtók í nótt mann á fertugsaldri í íbúðablokk í suðurhluta Osló.

Handtakan kom í kjölfar viðtækra aðgerða lögreglunnar sem meðal annars girti af hús Stórþingsins en talið var að maðurinn sem handtekinn var hafi ætlað að koma sprengju fyrir í Stórþinginu.

Í frétt um málið á vefsíðu Verdens Gang segir að í gærkvöldi hafi borist tilkynning um mann klæddan skotheldu vesti og með þungan poka í fórum sínum í strætisvagni. Hann hafði uppi háværar hótanir um að sprengja hús Stórþingsins.

Áður en sérsveitin réðist til atlögu í nótt voru rúmlega 40 íbúar í blokkinni fluttir á brott.