Bresku smyglstúlkurnar sagðar tengjast glæpahring

Breska blaðið The Daily Mail segist hafa sannanir fyrir því Melissa Reid, sem setið hefur í gæsluvarðhaldi fyrir að reyna að smygla sex kílóum af kókaíni frá Perú, hafi ekki verið neydd til verksins eins og hún hefur haldið fram. Reid, sem er tvítug, hafi þvert á móti verið tengd glæpagengi á spænsku eyjunni Ibiza þar á meðal Shane Knowles, 37 ára margdæmdum glæpamanni.

The Mail on Sunday birtir myndir af skælbrosandi Reid í veislu með Knowles og öðru vinafólki, að því er blaðið heldur fram.

Á annarri mynd, sem tekin er af Facebooksíðu Reid, má sjá aðra mynd af henni og Knowles. Þá hefur blaðið það eftir nágrönnum Melissu að hún hafi neytt eiturlyfja eftir að hún flutti til Ibiza til að vinna á bar yfir sumarið.

Blaðið heldur því einnig fram að íbúð Reid hafi verið notuð fyrir eiturlyfjaviðskipti og að hún og Michaella McCollum Connolly sem handtekin var með henni í Perú hafi búið saman á Ibiza en ekki bara hist fyrir ferðina örlagaríku eins og þær haldi fram. Þá hafi leigubílstjóri í Lima, höfuðborg Perú, keyrt stúlkurnar á milli verslana og þær hafi virst afslappaðar en ekki verið eins og stúlkur sem neyddar hafi verið til að smygla mörgum kílóum af kókaíni.

Shane Knowles hefur oft komist í kast við lögin. Hann missti auga þegar hann var nærri barinn til dauða árið 1999 af mönnum sem tengdust glæpaforingjanum John Palmer, oftast kallaður Goldfinger, á bar á Tenerife.

Efnið sem Reid og Connolly voru stöðvaðar með er talið vera um 1,5 milljóna punda virði sem samsvarar um 300 milljónum íslenskra króna.