„Enginn vilji hjá Ísrael að semja um raunverulegan frið“

Palestínumenn hafa brugðist ókvæða við áætlunum Ísraela að byggja nærri 1.200 ný heimili á landnemabyggðum á Vesturbakkanum og í Austur Jerúsalem. Palestínumenn búa nú þegar á svæðinu og verða þeir fluttir annað. Alþjóðleg lög segja að landtökur sem þessar séu ólöglegar en Ísraelsmenn eru á öðru máli.

Húsnæðismálaráðherra Ísraels, Uri Ariel tilkynnti um ákvörðunina í gær. Óttast er að hún komi til með að hafa áhrif á fyrirhugaðar samningaviðræður á milli Palestínu og Ísraels sem hefjast eiga á næstu dögum. Síðustu friðarviðræður fóru einmitt út um þúfur í september, 2010 vegna deilna um landtökur Ísraelsmanna.

Um hálf milljón gyðinga búa á svokölluðum landtökusvæðum sem byggð hafa verið síðan 1967 þegar hernám Ísraela á vesturbakkanum og austur Jerúsalem hófst. Ariel svaraði gagnrýnisröddum í morgun með þeim orðum að engin þjóð tæki við skipunum frá öðrum þjóðum um hvar hún byggi hús og hvar ekki.

Mahmoud Abbas, forseti Palestínu, sagði á dögunum að ekkert yrði af friðarviðræðum nema Ísraelar féllu frá öllum áætlunum um nýja landnemabyggð. Það loforð fékk hann hinsvegar ekki en eftir að John Kerry, utanríkisráðherra Bandaríkjanna miðlaði málum var samþykkt að deiluaðiliar reyndu að ná sáttum.

Mohammed Shtayeh, aðalsamningamaður Palestínu, sagði í dag að ljóst væri að engin vilji væri hjá Ísrael að semja um raunverulegan frið. Í raun væri stefna Ísraela að gera að engu þær alþjóðlegu samþykktir sem miða að því að Palestína verði sjálfstætt ríki með sömu landamæri og voru 1967.