Fjöldaslagsmál í réttarsal

Dómsmáli gegn þrettán meðlimum glæpagengis var frestað í Glostrup í morgun eftir að hópslagsmál brutust þar út. Politiken segir frá þessu.

Mennirnir eru allir tengdir klíkunni Brothas, og eru ákærðir fyrir að hafa haft undir höndum þrjár haglabyssur.



Eitthvað virðist hafa slest upp á vinskapinn þar sem einn sakborninga kallaði stundarhátt: „Haltu nú kjafti!“ og rauk í annan. Það varð til þess að fleiri slógust í leikinn, sem endaði með því að lögreglumenn þurftu að yfirbuga og fjarlægja um helming sakborninga úr réttarsalnum.



Þegar leikar tóku að róast var allt á rúi og stúi í réttarsalnum. Húsgögn brotin á víð og dreif, blóð á gólfi og drykkjarvatn úr könnum hafði skvest yfir málsskjöl saksóknara.