Býður börnum frá Fukushima nýtt heimili

Akira Sugenoya, borgarstjóri í japönsku borginni Matsumuto, hefur boðið börnum frá Fukushima og fjölskyldum þeirra að koma til Matsumoto, og fá þar bæði húsaskjól og skólagöngu.

Þetta gerir hann í von um að bjarga börnunum frá því að fá krabbamein í skjaldkirtil, en þau eiga það á hættu vegna geislamengunar frá kjarnorkuverinu sem eyðilagðist í náttúruhamförum árið 2011.

Áður en Sugenova gerðist borgarstjóri starfaði hann sem skurðlæknir. Fyrir aldarfjórðungi eða svo bjargaði hann með skurðaðgerð lífi meira en hundrað barna í Tsjernobyl eftir kjarnorkuslysið þar árið 1986.

Þótt geislamengunin frá Fukushima teljist lítil, þá hefur Alþjóða kjarnorkumálastofnunin staðfest að lítil geislamengun geti valdið krabbameini í skjaldkirtli. Þetta megi þó koma í veg fyrir með skurðaðgerð.

Sugenova vonast til þess að með því að bjóða börnunum frá Fukushima að koma til Matsumoto megi koma í veg fyrir að þau veikist af krabbameini í skjaldkirtli.

„Ef ótti minn reynist staðlaus, þá væri ekki hægt að fá betri fréttir,” hefur AP fréttastofan eftir Sugenova. „En ef þetta verður að veruleika, þá er naumur tími þangað til þetta verður of seint.”

Sugenova hefur gagnrýnt viðbrögð japanskra stjórnvalda við skemmdunum, sem urðu á kjarnorkuverinu í Fukushima. Enn er geislamengun að berast frá verinu, bæði út í loftið og út í haf.

Tafir hafa ítrekað orðið á hreinsunaraðgerðum og búist er við því að enn geti liðið mörg ár eða jafnvel áratugir áður en óhætt verður fyrir íbúana að snúa til baka.