Blóðug átök í Egyptalandi

Talið er að yfir eitt hundrað manns úr röðum Bræðralags múslima hafi fallið í átökum í Kaíró við  herinn í Egyptalandi í nótt. Allt að 4500 eru sagðir hafa slasast.

Stuðningsmenn Mohammed Morsi, fyrrverandi forseta landsins, skipulögðu mótmælafund í höfuðborginni í nótt, nærri Rabaa al-Adawiya moskunni. Herinn hóf fljótlega tilraunir til að dreifa mannfjöldanum án árangurs.

Vitni að átökunum segja að hermenn hafi þá hafið skothríð á hópinn. Tölum ber ekki saman um hversu margir féllu, heilbrigðisráðherra landsins sagði að 20 hefðu fallið og 177 slasast.

Sjónvarpsstöðin Al Jazeera telur að ekki færri en 120 manns hafa fallið og yfir 4500 séu særðir. Blaðamenn á staðnum segja að skothríðin hafi staðið yfir klukkutímum saman.

Tvær vikur eru síðan hermenn skutu til bana 50 liðsmenn úr Bræðralagi múslima á mótmælafundi í austur Kaíró.

Herforinginn, Abdel Fattah al-sisi er talinn hafa aukið á ólguna í landinu í gær þegar að hann hvatt fólk til að fjölmenna á götur borgarinnar til að sýna stjórnvöldum stuðning í baráttunni gegn hryðjuverkamönnum og átti þar við fylgjendur Mohammed Morsi.