Obama skrefi nær hernaðaríhlutun í Sýrlandi

Þingmenn sem sæti eiga í utanríkismálanefnd Öldungadeildar Bandaríkjaþings samþykktu í gær drög að ályktun sem myndi heimila Bandaríkjaher beitingu hervalds í Sýrlandi.

Drögin voru samþykkt eftir að John Kerry utanríkisráðherra hafði rætt við nefndina og hvatt nefndarmenn til að styðja sjónarmið Obama forseta í málinu, sem vill refsa Sýrlandsstjórn fyrir beitingu efnavopna í styrjöldinni sem þar geisar.

Samkvæmt ályktuninni, sem kosið verður um í næstu viku, fær herinn sextíu daga til þess að gera árásir á landið, en bann er sett við innrás landhers. Þá gæti forsetinn framlengt herleiðangurinn um þrjátíu daga til viðbótar, fái hann til þess leyfi frá fulltrúadeild þingsins.