Embættismanni drekkt í yfirheyrslum

Kínverskir lögreglumenn drekktu nýverið embættismanni, sem ásakaður hafði verið um spillingu, í harkalegum yfirheyrslum.

Manninum var dýft ítrekað í ískalt vatn með þeim afleiðingum að hann lést. Yfirheyrslunum lauk ekki fyrr en maðurinn var alveg hættur að hreyfa sig.

Ekkjan hefur nú farið fram á háar skaðabætur. Hún segir að maður sinn hafi sætt margvíslegum pyntingum þá 38 daga sem  hann var í  haldi.

Maðurinn var handtekinn í mars, sakaður um að hafa misnotað völd sín í auðgunarskyni í tengslum við breytingar á byggðaskipulagi.

Fréttastofan AFP skýrir frá þessu og vitnar í kínverska fjölmiðla sem hafa sínar heimildir frá saksóknara.