Sandy kostaði yfir 110 manns lífið, tjónið er hrikalegt fyrir efnahagslífið

Staðfest hefur verið að 46 manns fórust í ofsaveðrinu Sandy á austurströnd Bandaríkjanna í gærdag. Þar með hefur Sandy kostað yfir 110 mannslíf á ferð sinni frá Karabíska hafinu til Kanada.

Ofsaveðrið gekk töluvert niður í nótt og ekki er reiknað með að það valdi frekari skaða en orðinn er á austurströndinni. Hinsvegar hefur veðrið breyst í blindbyl í Virginíu og víðar þar sem snjókoman jafngildir hátt í metra af jafnföllnum snjó á sumum stöðum.

Efnahagsafleiðingarnar eru hrikalegar fyrir Bandaríkjamenn. Beint tjón vegna flóða, rafmagnsleysis og skemmda á híbýlum er metið á yfir 10 milljarða dollara eða um 1.300 milljarða króna.

Óbeint tjón er mun meira og því Sandy veldur því að hagvöxtur í Bandaríkjunum mun minnka um rúmt prósentustig á þessum ársfjórðungi og var hagvöxturinn þó ekki beysinn fyrir. Þetta skýrist af því að 60 milljónir manna búa í ríkjunum þar sem Sandy olli mestu eyðileggingunni og þau eru mikilvæg undirstaða undir landsframleiðslu landsins. Þetta kemur fram á Bloomberg fréttaveitunni.

Endurreisnarstarfið er hafið en ljóst er að langan tíma tekur að koma daglegu lífi í borgum eins og New York í eðlilegt horf.

Barack Obama Bandaríkjaforseti mun heimsækja New Jersey í dag. Hann stappaði stálinu í þjóð sýna í gærkvöldi og hvatti þá embættismenn til að gera allt sem í þeirra valdi stæði í endurreisnarstarfinu. Ekkert mætti hindra það og engar afsakanir um hægagang yrðu teknar til greina.