Hundur beit þáttastjórnanda í beinni útsendingu

Þáttastjórnandi í Bandaríkjunum var fluttur á sjúkrahús eftir að 40 kílóa hundur beit hana í andlitið í beinni útsendingu. Myndband af atvikinu hefur vakið gríðarlega athygli.

Kyle Dyer hefur stjórnað fréttaþætti á sjónvarpsstöðinni KUSA-TV í rúm 15 ár. Fyrr í vikunni fékk hún heldur óvanalegan gest þegar hundurinn Warrior Maximus kom í heimsókn. Warrior er af tegundinni Dogo Argentino.

Warrior hafði verið bjargað úr vök fyrir nokkru. Í þættinum var hann á ný kynntur fyrir slökkviliðsmanninum sem bjargaði honum. Þegar nokkrar mínútur voru liðnar af viðtalinu sökkti Warrior tönnunum í andlit Dyers.

Dyer brá mjög og féll aftur á bak. Framleiðendur þáttarins klipptu því næst á veðurfréttamann sem sjálfur virtist vera í losti.

Læknar segja að bitið hafi verið djúpt. Dyer gekkst undir lýtaaðgerð samdægurs og mun ná fullum bata. Hún hefur haft samskipti við aðdáendur sína og vini í gegnum iPad spjaldtölvu.

Hægt er að sjá myndbandið hér að ofan. Einnig er hægt að sjá björgun Warriors hér.