Mantel fyrsta konan sem vinnur Booker verðlaunin tvisvar

Breski rithöfundurinn Hilary Mantel hefur unnið Booker bókmenntaverðlaunin í annað sinn. Þar með er Mantel fyrsta konan og jafnframt fyrsti Bretinn til þess að vinna þessi virtu bókmenntaverðlaun tvisvar.

Mantel vann verðlaunin fyrir bók sína Bring up the Bodies en sú bók er sjálfstætt framhald bókarinnar Wolf Hall sem Mantel hlaut Booker verðlaunin fyrir árið 2009.

Báðar bækurnar fjalla um líf og störf Thomas Cromwell sem var ráðgjafi Hinriks áttunda Englandskonungs á fyrrihluta 16. aldar. Þriðja bókin um Cromwell er væntanleg frá Mantel.