Mona Lisa á tvíburasystur

Viðgerðir á málverki af Monu Lisu, sem hefur árum saman verið geymt á Prado-listasafninu í Madrid, leiddu í ljós að það var málað á sama tíma og hið fræga verk Leonardo da Vincis.

Áður var talið að málverkið væri eftirgerð af verki da Vincis, en nú þykir ljóst að nemandi hans hafi málað mynd af sömu fyrirsætu um leið og meistarinn málaði sitt verk, og nemandinn þá haft vinnubrögð da Vincis til hliðsjónar.

Þessi nýuppgötvaða „tvíburasystir" Monu Lisu verður fyrst sýnd opinberlega í Prado-safninu 21. febrúar. Myndin verður síðan til sýnis við hlið hins fræga verks da Vincis í Louvre-safninu í París frá 26. mars. -gb