Annan krefst vopnahlés í Sýrlandi

Kofi Annan, erindreki Sameinuðu Þjóðanna og Arababandalagsins í Sýrlandi, ætlast til að yfirvöld í landinu komi á tafarlausu vopnahléi.

Stjórnvöld í Sýrlandi samþykktu friðaráætlun Annans í síðustu viku - ekkert bólar þó á vopnahléi né friðarumleitunum við andspyrnumenn.

Talsmaður Annan sagði að tíminn sé að renna út fyrir yfirvöld í landinu.

Friðaráætlunin gerir ráð fyrir hléi á átökum í landinu og verður Sameinuðu Þjóðunum falið að hafa umsjón með vopnahléinu.

Fregnir hafa borist af átökum í Sýrlandi í dag. Andspyrnumenn segja að hersveitir hafi enn á ný látið sprengjum rigna yfir borgina Homs í dag.

Þá var einnig barist í borginni Idlib en leyniskyttur sýrlenska hersins hafa fellt fjóra andspyrnumenn. Að minnsta kosti 20 létust í átökunum í gær.

Mannréttindaráð Sameinuðu Þjóðanna telur að um 9.000 manns hafi fallið í Sýrlandi frá því að átök hófust fyrir rúmu ári síðan.