Sandra María hvött til að gagnrýna fjölmiðla

Sandra María Jessen, leikmaður Þór/KA, er einn nýliðanna í landsliðshópi Íslands í knattspyrnu sem mætir Ungverjalandi í undankeppni EM 2013 á Laugardalsvelli á laugardaginn.

Sandra María kom hlæjandi í viðtal hjá undirrituðum á æfingu landsliðsins á Laugardalsvelli í gær. Ástæðan var sú að félagar hennar í landsliðinu höfðu sett á hana pressu að kvarta undan því í viðtalinu að öll athygli fjölmiðla beindist að liðsfélaga hennar hjá Þór/KA, Katrín Ásbjörnsdóttir, en ekki að henni. Greinilega gaman hjá Söndru á hennar fyrstu æfingu en knattspyrnukonan efnilega lét ekki undan pressu félaga sinna.

„Þetta er ótrúlega gaman og mikil reynsla," segir Sandra María sem ætlaði að njóta þess að taka þátt í sinni fyrstu æfingu með landsliðinu þrátt fyrir smá stress.

Sandra var kölluð inn í hópinn í stað áðurnefndrar Katrínar sem þurfti að draga sig úr hópnum vegna meiðsla. Þrátt fyrir að vera í skýjunum yfir því að hafa verið valin vorkennir hún Katrínu sárlega.

„Hún meiddist þegar landsliðið fór til Algarve í vor. Hún hefur verið tæp síðan þá og fór í aðgerð í vetur vegna beinhimnubólgu. Hún hefur verið tæp í allt sumar," segir Sandra sem segist láta sig dreyma um að spila með landsliðinu einn daginn. Hún sé þó raunsæ og reikni ekki með miklum spiltíma í leikjunum tveimur sem framundan eru.

Þór/KA situr á toppi Pepsi-deildar kvenna og hefur gengi liðsins komið flestum á óvart. Ekki þó Söndru.

„Við vissum að við gætum þetta og snerum töflunni á hvolf miðað við undirbúningstímabilið. Mér sýnist allt vera í toppstandi hjá okkur," segir Sandra María sem telur samheldnina styrk liðsins.

„Við kunnum hver á aðra. Vitum hverjir vilja fá hann í fætur eða fá stungusendingar eins og henta mér vel," segir Sandra María.