Verður sett met í kvöld? | Þétt setinn bekkurinn í gærkvöldi

Frábær aðsókn var á knattspyrnuvelli landsins í gærkvöldi þegar fyrsta umferð Pepsi-deildar karla fór fram. 1690 áhorfendur mættu á leikina fimm að meðaltali. Umferðinni lýkur í kvöld með Reykjavíkurslag Fram og Vals en allt stefnir í að aðsóknarmet fyrstu umferðar verði slegið.

Flestir áhorfendur gærkvöldsins eða 2383 létu sjá sig á Kópavogsvelli þar sem nýliðar Skagamanna unnu 1-0 sigur á Breiðabliki. Aðeins færi urðu vitni að jafntefli KR og Stjörnunnar í Vesturbænum eða 2164.

Fæstir áhorfendur sáu Fylki og Keflavík gera 1-1 jafntefli í Árbænum en 1076 lögðu leið sína í Lautina. Meðalfjöldi á leikina fimm í gærkvöldi var sem fyrr segir 1690 manns.

1318 áhorfendur mættu að meðaltali á leiki fyrstu umferðar í fyrra sem var nokkuð lægra en árin á undan.

Meðalmæting á völlinn í fyrstu umferð undanfarinn áratug:

2011 7908 (1318 á leik)

2010 8259 (1421 á leik)

2009 6885 (1147 á leik)

2008 8730 (1455 á leik)

2007 6950 (1390 á leik)

2006 7964 (1593 á leik)

2005 7885 (1577 á leik)

2004 7196 (1439 á leik)

2003 6488 (1298 á leik)

2002 7019 (1404 á leik)

Um 1100 áhorfendur þurfa að láta sjá sig á Laugardalsvelli í kvöld til þess að slá aðsóknarmetið frá árinu 2006. Leiða má að því líkum að bekkurinn verði þétt setinn í kvöld enda bæði lið staðið sig vel á undirbúningstímabilinu.

Fyrir þá sem eiga ekki heimangengt á Laugardalsvöllinn í kvöld verður leikur Fram og Vals í beinni útsendingu á Stöð 2 Sport klukkan 19.15. Þá verður Boltavakt Vísis einnig með beina textalýsingu frá leiknum.