Heldur ævintýri Celtic áfram í Meistaradeildinnni?

Skoska meistaraliðið Celtic hefur komið gríðarlega á óvart í riðlakeppni Meistaradeildar Evrópu í knattspyrnu það sem af er. Celtic lagði spænska stórliðið Barcelona 2-1 á heimavelli í síðustu umferð og í kvöld mætir Celtic liði Benfica í Portúgal. Celti getur tryggt sér sæti í 16-liða úrslitum með sigri gegn Benfica og jafntefli gæti einnig dugað fyrir skoska liðið.

Johan Mjällby, aðstoðarþjálfari Celtic, segir að það yrði stórkostlegur árangur hjá liðinu ef það færi í 16-liða úrslit. Celtic er í G-riðli ásamt Barcelona, Benfica og Spartak frá Moskvu.

„Við getum ekki keppt fjárhagslega við hin liðin í okkar riðli og leikmenn Celtic hafa sýnt vilja til þess að ná árangri og bæta leik sinn. Það átti engin von á því að við myndum blanda okkur í baráttuna í þessum riðli þegar ljóst var hvaða lið voru í þessum riðli. Við höfðum alltaf trú á okkar leikmönnum og þeir eru stöðugt að koma okkur á óvart," sagði Mjällby en hann lék sem varnamaður með Celtic á sínum tíma og var lykilmaður í sænska landsliðinu á árum áður. Neil Lennon er knattspyrnustjóri Celtic.

Það er mikið um að vera í Meistaradeild Evrópu í knattspyrnu í kvöld og mikið í húfi hjá mörgum liðum í riðlakeppninni. Alls verða fjórir leikir í beinni útsendingu á sportstöðvum Stöðvar 2 og er fyrsti leikurinn á dagskrá kl. 17 þar sem að stórlið Barcelona mætir Spartak á útivelli í Moskvu í Rússlandi.

Þorsteinn J fer að venju yfir það sem hæst ber í upphitunarþætti sem hefst kl. 19 og öllum leikjum kvöldsins verða gerð skil í Meistaramörkunum sem hefjast kl. 21.45.

16:55 Spartak Moskva – Barcelona | Sport 2 | HD

19:00 Þorsteinn J. og gestir – upphitun | Sport 2 | HD

19:30 Valencia - Bayern Munchen | Sport 4 |

19:30 Galatasaray - Man. Utd. | Sport 3 |

19:30 Juventus – Chelsea | Sport 2 | HD

21:45 Þorsteinn J. og gestir – meistaramörk | Sport 2 | HD